خبري شننې

ننوتل

زما په ګل وطن دې څه څه وکړل؟؟

لیکوال: محمد نعیم لندن    نیټه: (2011-11-17)

د ال پارټي کانفرنس کې د پنجاب مشر نواز شريف په خپله وينا کې د پاکستان د اې ايس اې او پاک پوځ نه وپوښتل چې اخير څه خو دي چې ټوله نړۍ په يو خوله د اې ايس اې نوم اخلي؟ نو په ځواب کې ورته د پاکستان او اسلام د بيرغ مشر د پاک پوځ جرنال کياني وويل چې ستا سره به يو په يو خبرې وکړم او ټولې ګيلې به دې لرې کړم.

 

بيشکه د نواز شريف ګيلې خو به ورکې شي خو زما د پرهر پرهر پښتونخوا زخمونه به څوک ټکور کړي، د هغه ميندو غيږې چې د اې ايس اې په چړو ويجاړې شوي، هغه غيږې به څوک وژاړي، هغه پلاران او هغه ځلمې چې هوجرې او جوماتونه پرې ښايسته ول ،هغه به څوک له تورو خاورو بيرته راولي؟ د ترهګرۍ په پلمه کې چې د سوات درېنيم ميلنه وګړي درپه در او خاورې په سر شول، کورونه يي تاله شول، غيرتونه او عظمتونه  يي نيلام شول، هغه به څوک بيرته راولي؟ هغه سرونه به څوک پورته کړي چې ستا د اې ايس اې په چړو پريک شول؟ جرنال صيب دا د نواز شريف د ګيلې خبره نه ده دا د يو عظيم او غيرتمن قام د مرګ او ژوند پوښتنه ده. دا د هغه قام د ټول وژنې خبره ده چې ستا په حکم د اې  ايس اې قصابانوترې  سرونه قلم کړل او نن د هغې ننګيال قام باتوران بچې د پنجاب په يتم خانو کې پراتۀ دي او کله چې دغه بچيان ځوانان شي نو دا به د اې ايس اې تربيه شوي تالبان وي. تر اوسه به اې ايس اې په مدرسو کې تالبان تربيه کول او اوس يي په يتم خانو کې تربيه کوي.

اخير د پښتون قام څه ګناه ده چې د پاک پنجاب پوځ ورته د نسلونو نسلونو سزاګانې ورکوي؟ پښتون قام د دې پوځ کومه مرسته نه ده کړې؟ په هند کې پښتانه جنګوي، په کشمير کې پښانۀ جنګوي، په افغانستان کې پښتانۀ جنګوي او په خپله په شاهي محلونو کې ټول عمر پيسې شماري، خو بيا هم د پاک پوځ زړه پرې يخ نه شو. اخير دا ولې؟

الله پښتنو ته هغه منابعې او دولتونه ورکړي، چې د خټک با با خبره، په جنتي خاوره نهر ګرځمه، غرونه او سيندونه، هواګاني او فصلونه، او اوس د پښتون د پښو لاندې ځمکه د تورو او سرو زرو امبارونه دي، په کوهاټ کې د ګيس زخيرې، په سوات او باجوړ کې د تامبې او يورينم کانونه، د سوات په جنت کې د نړۍ د سيلانيانو د راتګ نه چې کومې پيسې راتللی شي، په دې د ټول هيواد اقتصاد جوړيدلی شي، خو د اې ايس اې تالبان ولې نه غواړي چې د دې منابعو نه د ټول هيواد خلک ګټه پورته کړي؟ دوی ولې د دې قام نه تالبان او ترهګر جوړوي؟

دوی په ډير چل پښتون قام د دې منابعو نه بې برخې کوي، دوی د پښتنو په سيمو کې د ترهګرۍ او تالبانو اور ځکه لګوي چې غواړي ځايي خلک مجبور شي او دغه سيمې پريږدي او يا په دغه سيمو کې دوی په اقليت بدل کړي، هم دغه رنګ به د پنجاب خلک وتوانيږي چې د پښتنو په سيمو قبضه وکړي، پښتانه به يو اړخته د خپل لوی کور افغانستان له ګاونډ څخه ليرې شي نو بل اړخته به ترې خپله پښتون ولي هيره شي، او هم څنګه چل چې دوي د بلوڅو سره وکړ هم په هغه ټوپک اوس پښتانۀ وژني. دا پيل دوی له سوات د جنتي خاورې نه وکړ.

په درسته نړۍ کې  د سوات په شان ښاسته ځای نشته، د سوات مځکه د لندن او ټوکيو له مځکو زيات نرخ کوي، په ځينو ځايونو کې خو يو پوټ مځکه په يو ملين روپۍ هم نه تر لاسه کيږي، خو نن هغه مځکه خلک مجبور دی چې په سل روپی پوټ يي خرڅ کړي او چيرته د پنجاب په ميرو کې ورک شي. د سوات هغه پښتانۀ چې عظمت او غيرت ته به يي غرونو هم سرونه  ښکته کول نن پرې د پنجاب پوځ په خپلو سيمو او کورونو کې غوږونه نيسي. د سوات په ټول تاريخ کې نه چيرته تالب وو او نه چا ترهګر پيژندو، دا څنګه د ورځو په حساب سره په کې د ترهګرو ځالي جوړې شوي، بايد کياني صيب ځواب ووايي؟؟

 

کله چې په امريکه کې د ناين ايلون واقعه رامنځته شوه هم په هغه ورځ د پاکستان څارګرې ادارې د پښتون قام د ټول وژني پروسه په کار واچوله. د ترهګرانو اصل حقيقت هم دې اې ايس آي ته معلوم و، چې دا څوک دي او چيرته اوسيږي او څوک يي پالنه او تربيه کوي، او دا ځکه چې هم دا کار دوی کاو او کوی يي. نو پوهيدل چې ټول ترهګر خو په پاکستان کې  دي او ټولې ترهګريزې پيښې هم له دغه خوا ترسره کيږي نو يو ورځ به دا برغولی ماتېږي او غربي نړۍ به په دې خبره پوهيږي چې د تالبانو اصل ځالي چيرته دي، د ناټو عسکر به په دې تالبانو پسې تر اسلام اباده راځي او لاره يي يوه ده، د پښتنو په سيمو به راځي او د اې ايس اې ترهګر به په نښشه کوي، دوی پوهدل چې پاک پوځ د ناټو په وړاندې هيڅ هم نه شي کولای، نو دوی د پښتونو په سيمو کې لا له وړاندې اور بل کړو، خپل تربيه شوي ترهګر يي د پښتونو په سيمو ورسم کړل، څه ځايي خلک يي هم د ځان سره شامل کړل او بيا يي غربي نړۍ ته غږ وکړ چې تاسې فکر مه کوئ ،موږ ته پيسې راکوئ او موږ يي درته وژنو او تاسې مه راځئ ځکه چې دا پښتانه قبايل ډير خطرناک دي، دوی په خپله خاوره بې زموږ د پاک پوځ بل هېڅ څوک نه مني، تاسې بس زموږ مالي مرسته وکوئ.

دې ته وايي په يو غشي دوه ښکاره، هم به پښتون تباه او برباد شي او هم به پرې د غرب څخه پيسې واخلو.

د دې ډرامې لومړی قسط يي زما په ګل وطن( سوات) کې وکړو. بس دومره کيسه وه چې زما د سوات سره څه وشول؟ خو د سوات ماشوم ماشوم پرې خبر دی چې اې ايس اې ورسره څه وکړل؟ او د اې ايس اې تالبان دې په دې هم پوه شي، چې پښتون په خپله خاوره د خپل ځان نه زيات مين دی.

که خازې شنې مې په قبر وي ولاړې

که غلام مړ وم راځۍ توکۍ پرې لاړې

که په خپلو وينو نه وم لمبيدلی

په ما مه پهلتوئ د جمات غاړې.

Comments (0)

2500 characters remaining

Cancel or

Afghan Jirga on FAcebook

Afghan Jirga on Twitter

 Afghan Jirga on Yotube